NÉNG Ijah, tatanggi énggal alihan ti kota, unggal dinten jilbabna sok guntas-gentos. Matak uruy anu ninggal. Kantenan ibu-ibu pangaosan mah. Sateuacan angkat ka madrasah, saurna sok ngacak-acak heula lomari. Ngotéktak, susuganan aya tudung atanapi gamis nu modelna mirip sapertos jilbab nu sok dianggé ku Néng Ijah. Tapi, weléh, teu kapendak. Bubuhan bénten zaman. Gamis sareng tudung ibu-ibu pangaosan mah seuseueurna motif rénda. Demi jilbab Néng Ijah, salian ti seueur motif, sareng rupi-rupi bahan. Rarangkénna ogé meni buricak burinong. Kumargi kitu, dina waktosna pangaosan, ibu-ibu téh sanés ngupingkeun ceramah ajengan. Tapi, kadon silih rérét, silih kiceup, niténan jilbab nu sok dianggé ku Néng Ijah. Kumaha atuh ari Ceu Nonoh? Sok sanaos jalmi teu gaduh, angkat ka pangaosan cekap ku nganggé sinjang, kabaya, sareng tudung belél. Ceu Nonoh mah teu kacandak sirik pidik. Dina cepilna, masih kénéh nongtoréng cariosan Kang Odong, carogéna. “Urang apal pagawéan salakina. Tong kabita ku jilbab hasil korupsi!”
