BUDAK meunang hayang. Gubrag ka dunya pas bulan puasa. Dingaranan wé ku kolotna téh maké ngaran islam. Nyokot tina qur’an. Ngarah soléh, bisa babakti ka indung bapa, bangsa katut agama. Kitu, dunga nu jadi kolotna. Lulus SMA. Budak ngaran islam, kuliah ka kota gedé, tepi ka diwisudana. Basa ku kolotna dititah balik ka lembur, ngurus pausahaan. Budak ngaran islam, mugen. Alesanana, di lembur mah kurang progrésif. Mending di kota gedé. Loba lahan baseuh, jeung deuih néangan jodo ogé teu hésé. Awéwéna gareulis. Buhan budak meunang hayang. Nya, dianteur wé sakahayangna. Nu penting, teu poho ka lembur. Teu poho ka jelema leutik, teu poho nyumbang ka masjid-masjid. Hiji poé, budak maké ngaran islam, asup kana tivi. Mimitina mah kolotna atoh, sugan budak meunang hayang téh jadi artis. Tapi sanggeus dibéjaan ku tatangga, budak nu maké ngaran islam aya dina tivi, gara-gara korupsi. Jadi tersangka koruptor. Indung bapana kaserang jantung, maot ngadadak.
